كتبت : آيه جمال
مها أحمد الجندى، فنانة تشكيليه من مواليد محافظة البحيرة، تبلغ من العمر 32 عامًا، برزت موهبتها في الرسم منذ الطفولة وعملت علي تنميتها وتطويرها مع الوقت…
كيف كانت بدايتك مع مشوار الرسم؟
كنت بحب الرسم من وأنا صغيرة وبدأت موهبتي تظهر وأنا عندي 6 سنين وده اللي اكتشفوه مدرسين التربية الفنية في مدرستي.
رسمك نتيجة موهبة أم تدريب ودراسة؟
موهبة ودراسة، أنا دخلت كلية تربية نوعية قسم فنون وكمان بدرس للأطفال الرسم من حوالي 14 سنة ولسه مكمله إن شاء الله.
من قام بتشجيعك علي الرسم؟
والدي الله يرحمه كان دايمًا بيشجعني، ووالدتي وأخواتي كانوا ومازالوا بيشجعوني لحد دلوقت أني اوصل لحلمي.
ما هي العقبات التي واجهتك وكيف تغلبت عليها؟
إن المدينه مش بتدعم الفنانين بصوره كبيره ومش متوفر خامات بس الحمد لله قدرت اوفر من أماكن مختلفة
وكمان الماركات بتاعه الادوات كتير فطبعا بجرب انواع كتير لحد مااوصل للى يقدر يخدم العمل الفنى.
كم يستغرق الوقت لرسم لوحة فنية؟
كل لوحة لها توقيتها، يعني علي حسب فكرة اللوحة والحالة اللي بعيشها، ممكن أسبوع أو ساعات أو ساعتين.
أي اكتر لوحة أثرت في حياتك؟
لوحة الدرويش لأنها بتمثل الدرويش وهو سارح في الملكوت وسط الكواكب والنجوم والخيال المطلق وده بيعبر عن الحرية والانطلاق نحو الخيال والأحلام بالنسبالي.
أي أنواع الرسم تفضلي؟
أفضل أنواع الرسم الحر، الرسم بالزيت والاكريليك ومختلف الألوان اللي بقدر اركب ألوان جديدة منها.
ما هي الأدوات التي تقومي باستخدامها؟
بستخدم الفرش بكل أنواعها وسكينة الألوان.
هل لديك طقوس معينة للرسم؟
أيوة، بحب أرسم في هدوء ومزيكا هاديه وأبعد عن السوشيال ميديا كلها وكمان أكون بعيدة عن أي ضغوط نفسية لأن ده بينعكس في الرسم.
ما أهدافك التي تتمني أن تحققيها في المستقبل؟
هدفي أني أكون فنانة تشكيلية عالمية وأسافر في كل العالم ولوحي تلف العالم كله، وافتح أكاديمية ال Monalisa Arts في كل مكان والأطفال بالأخص تتعلم الرسم والفن ويعبروا عن كل أحلامهم.
أشتركتي في معارض قبل كدا ؟
أيوة، اشتركت في معرض فكر اللون بقاعة الأهرام للفنون وحصلت علي شهادات وأوسكار، و اشتركت في معرض رؤي العربية للفنون التشكيلية في برج القاهرة، وحصلت علي تكريمات وشهادات دوليه.
تحبي توجهي رسالة لشخص في بداية مشواره؟
احب أوجه رساله لكل الموهوبين أنهم يرسموا كتير ويتعلموا اكتر وكل واحد يكمل في حلمه ويشتغل عليه ويحط هدف وان شاء يوصله.
